Chasa Editura Rumantscha
La Chasa Editura Rumantscha (CER) exista dapi l’entschatta 2010; ella è vegnida fundada cun il sustegn da la Pro Helvetia, dal Chantun Grischun e da la Lia Rumantscha.
La CER è ina Societad cun responsabladad limitada, ils associads èn la Lia Rumantscha (18 da 20 quotas) e l’Uniun per la Litteratura Rumantscha (2 quotas).
Questa chasa editura porscha servetschs d’ediziun professiunals; sia finamira è da render pli visibla la pitschna, ma viscla scena da litteratura rumantscha.
La CER edescha ovras belletristicas e cudeschs per uffants e giuvenils. Tut tenor ils manuscrits inoltrads vegnan publitgads cudeschs en ils idioms ed en rumantsch grischun, sco era en versiuns plurilingas.
La structura da la chasa editura è simpla e consista da la manadra da fatschenta Anita Capaul e da la collavuratura Karin Kohler-Pattis.
Il program d’ediziun vegn definì da duas cumissiuns. Al cussegl per las ediziuns per creschids appartegnan:
– Valeria Badilatti, romanista, magistra a la scola chantunala per creschids a Turitg
– Corsin Caglia, romanist, magister gimnasial
– Uorschla Natalia Caprez Brülhart, romanista
– Toni Vinzens, romanist, magister al gimnasi claustral Mustér
Al cussegl per ils cudeschs per uffants e giuvenils appartegnan:
– Donatella Bonifazi, moderatura
– Petronella Cavegn, bibliotecara
– Annatina Guidon Galliard, magistra primara