Verner Solèr (1968) è creschì si sco figl da purs a Vrin ed emmigrà cun 20 onns en l’America. El ha studegià film a l’Universitad da Los Angeles e fotografia al Stana Monica College.

1999 ha el entschet sco directur d’art tar l’agentura Saatchi & Saatchi a Los Angeles, nua ch’el ha sviluppà pliras campagnas che han retschet gronda renconuschientscha. Sia experientscha sco narratur sa mussa fitg en la qualitad dals maletgs; per far quels prenda el adina avunda temp.

Dapi passa 20 onns è Verner Solèr sa deditgà sper la lavur sco directur d’art a la fotografia, pli tard era al scriver sco furma d’expressiun. El ha lantschà plirs projects d’art, sco exposiziuns da fotografias, nua ch’i vegniva adina dumandà suenter ina publicaziun da quels maletgs.