Imelda Coray-Monn (1933–2009) è naschida a Cuira e creschida si a Mustér. Suenter la scolaziun da magistra ad Ingenbohl ha ella frequentà studis da lingua, psicologia ed istorgia d’art a las Universitads da Friburg e Turitg. Ella ha lavurà sco scolasta a Siat ed è lura ida a star cun ses um en la Svizra dal Nordvest, nua ch’els han gì ina famiglia cun otg uffants.
Imelda Coray-Monn ha sviluppà ina vasta activitad litterara e publicistica en rumantsch e tudestg. Ella ha publitgà poesias, paraulas, prosa curta, essais e translaziuns en differentas revistas rumantschas. Ella è stada redactura da la revista «Novas litteraras» ed ha fatg part da la suprastanza da l’Uniun svizra dals scripturs. Sper sia lavur litterara è ella s’engaschada sco schurnalista, publicista da cultura ed furmatura da creschids. Ella è cunzunt sa fatschentada cun dumondas da la rolla da la dunna, da l’educaziun e da la pedagogia sexuala ed ha publitgà il cudesch «Affons damondan», in mussavia davart l’educaziun sexuala. Ils onns 1980 ha ella absolvì ina scolaziun da logoterapia a Minca e fundà a Mustér ensemen cun l’autura Tresa Rüthers-Seeli l’instituziun sociala Liug da cussegl per carstgauns en pitgiras, nua ch’ella ha accumpagnà persunas cun problems psichics.
Sco autura, pedagoga e cussegliadra ha Imelda Coray-Monn marcà la scena culturala rumantscha ed accumpagnà svilups socials da la Surselva sur decennis.
Il 2026 ha la CER publitgà postum il roman «Carschen uost» dad Imelda Coray-Monn. L’ovra, scritta ils onns 1980, è vegnida rescuvrida en il relasch da l’autura en l’Archiv da cultura da dunnas dal Grischun ed edida da Viola Cadruvi e Rico Valär.
Foto: archiv privat da la famiglia